خدمة استشارة أسرية

السلام عليكم انا طالبة جامعية اخطأت وتزوجت عرفي من زميل لي وكنا نتقابل في شقته اثناء الدراسة وانا من محافظة غير محافظته ولما حصل وباء الكورونا مبقتش اروح الجامعة ومبقناش نتقابل وهو ظلوقتي بيلح علية علشان يقابلني وبيهددني اعمل ايه في المصيبة دي 😥

وعليكم السلام ورحمه الله وبركاته ابنتي الكريمة طبعاً اللوم والتأنيب مش هيكون ليهم فايدة خلاص إللي حصل حصل والفاس وقعت في الرأس لكن كلمتين هقولهم العبرة لغيرك اتقوا الله في انفسكم أولا وفي أهلكم اللي وثقوا فيكم ولا تنخدعوا بمعسول الكلام ولا الوعود الزائفة لأنه نهايتها مرار طافح إنتي طبعاً مصيبتك مصيبة أكيد عملتوا علاقة كاملة يبقي يا ست الكل لازم اهلك يعرفوا مهما كانت العواقب ابدأي بالغلبانة اللي شاربة المر امك وعرفيها مصيبتك وصلت لغاية فين وطبعاً هي لازم تبلغ ابوكي لأنكم من غير راجل يتصدر هذا اللص لص الاعراض هيستقل بيكم وممكن يبهدلكم أما ابوكي هيعرف يجيب حقك وياريت تكون معاكي ما يثبت الزواج العرفي والا البقاء لله في أي حق من حقوقك وربنا يتولاكي